എരുമേലിയിൽ കോഴിക്കൂട്ടിൽ കയറിയ പെരുമ്പാമ്പ് കുടുങ്ങി,പേടിച്ച് രണ്ട് കോഴികൾ ചത്തു,വനപാലകർ എത്തി പാമ്പിനെ പിടികൂടി

എരുമേലി :കാഞ്ഞിരപ്പള്ളി രൂപത മുൻ ബിഷപ്പ് മാർ മാത്യു അറയ്ക്കലിന്റെ എരുമേലി നേർച്ചപ്പാറയിലുള്ള കുടുംബ വീട്ടിൽ മുട്ടക്കോഴികളെ വളർത്തുന്ന കോഴിക്കൂട്ടിലാണ് പെരുമ്പാമ്പ് കുടുങ്ങിയത്.. ഒരു കോഴിയെ പോലും പിടിക്കാൻ കഴിയാതെ കൂട്ടിലെ ഇരുമ്പ് കള്ളികളിൽ പാമ്പ് കുരുങ്ങിയപ്പോൾ പാമ്പിനെ കണ്ട് പേടിച്ച് രണ്ട് കോഴികൾ ചത്തു. കൂട്ടിലെ മറ്റ് കോഴികൾ ഇതിനോടകം കൂടിനുള്ളിലെ അടുത്ത കള്ളികളിലേക്ക് മാറി രക്ഷപെട്ടിരുന്നു. കോഴികളുടെ ബഹളം കേട്ട് എത്തിയ വീട്ടുകാർ വനം വകുപ്പിൽ അറിയിച്ചതിനെ തുടർന്ന് പ്ലാച്ചേരി ഫോറസ്റ്റ് സ്റ്റേഷനിൽ നിന്നും വനപാലകർ എത്തി പാമ്പിനെ പിടികൂടി. പാമ്പിന് 25 കിലോയോളം ഭാരം ഉണ്ടെന്നും എട്ട് അടിയോളം നീളമുണ്ടെന്നും വനത്തിലേക്ക് വിടുമെന്നും വനപാലകർ അറിയിച്ചു. സമീപത്തെ കുടുക്കവള്ളി എസ്റ്റേറ്റിൽ നിന്നായിരിക്കാം പാമ്പ്‌ എത്തിയതെന്ന് നാട്ടുകാർ പറഞ്ഞു.