കോട്ടയത്ത് ദീപിക മലയാളം ദിനപത്രത്തിന്റെ 140-ാം വാർഷികാഘോഷത്തിൽ ഉപരാഷ്ട്രപതി പങ്കെടുത്തു

കോട്ടയത്തുള്ള കെ.സി. മാമ്മൻ മാപ്പിള ഹാളിൽ നടന്ന ദീപിക മലയാളം ദിനപത്രത്തിന്റെ 140-ാമത് സ്ഥാപക വാർഷികാഘോഷത്തിൽ ഇന്ത്യൻ ഉപരാഷ്ട്രപതി ശ്രീ സി.പി. രാധാകൃഷ്ണൻ പങ്കെടുത്തു. ദീപിക എക്സലൻസ് അവാർഡുകൾ അദ്ദേഹം  വിതരണം ചെയ്തു.

സമ്മേളനത്തെ അഭിസംബോധന ചെയ്തുകൊണ്ട് ഉപരാഷ്ട്രപതി ദീപികയുടെ 140 വർഷത്തെ യാത്രയെ "പ്രതിബദ്ധത, ധൈര്യം, വിശ്വാസ്യത, പൊതുസേവനം എന്നിവയുടെ ശ്രദ്ധേയമായ പൈതൃകം" എന്ന് വിശേഷിപ്പിച്ചു. പത്തൊൻപതാം നൂറ്റാണ്ടിന്റെ അവസാനത്തിൽ ഒരു പത്രം സ്ഥാപിക്കുന്നതിലെ വെല്ലുവിളികളെക്കുറിച്ച് പരാമർശിക്കവെ, വിദ്യാഭ്യാസത്തിനും ആശയവിനിമയത്തിനുമുള്ള പ്രവേശനം പരിമിതമായിരുന്ന ഒരു സമയത്ത് 140 വർഷങ്ങൾക്ക് മുമ്പ് ഒരു പ്രസിദ്ധീകരണം ആരംഭിക്കുന്നതിന് അസാധാരണമായ ദൃഢനിശ്ചയവും കാഴ്ചപ്പാടും ആവശ്യമാണെന്ന് അദ്ദേഹം പറഞ്ഞു. 

ജനാധിപത്യത്തിൽ ഉത്തരവാദിത്തമുള്ള പത്രപ്രവർത്തനത്തിന്റെ പങ്ക് എടുത്തുകാണിച്ചുകൊണ്ട്, പൊതുജീവിതത്തിലെ ഏറ്റവും ബുദ്ധിമുട്ടുള്ള മേഖലകളിൽ ഒന്നാണ് രാഷ്ട്രീയ നേതൃത്വമെന്നും ക്രിയാത്മകമായ വിമർശനം ന്യായവും സന്തുലിതവുമായി തുടരണമെന്നും ഉപരാഷ്ട്രപതി നിരീക്ഷിച്ചു. നല്ല പ്രവൃത്തികളെ അഭിനന്ദിക്കുന്നതിനൊപ്പം തെറ്റുകളെ നിർഭയം വിമർശിക്കുന്നതിലും പത്രപ്രവർത്തനത്തിന്റെ യഥാർത്ഥ ധർമ്മമുണ്ടെന്ന് അദ്ദേഹം അഭിപ്രായപ്പെട്ടു. 

സംഭവങ്ങൾ റിപ്പോർട്ട് ചെയ്യുന്നതിനപ്പുറം വലിയൊരു സാമൂഹിക ഉത്തരവാദിത്തം പത്രങ്ങൾ വഹിക്കുന്നുണ്ടെന്ന് ഉപരാഷ്ട്രപതി അടിവരയിട്ടു. പ്രതീക്ഷ, നൂതനാശയം, കാരുണ്യം, ശാസ്ത്രീയ പുരോഗതി എന്നിവയുടെ കഥകൾ കൂടി മാധ്യമപ്രവർത്തനത്തിലൂടെ  ഉയർത്തിക്കാട്ടണമെന്ന് അദ്ദേഹം പറഞ്ഞു, കാരണം അത്തരം ക്രിയാത്മകമായ പത്രപ്രവർത്തനം യുവജനങ്ങളിൽ ആത്മവിശ്വാസം ശക്തിപ്പെടുത്തുകയും രാഷ്ട്രനിർമ്മാണത്തിലേക്ക് അവരെ പ്രേരിപ്പിക്കുകയും ചെയ്യുന്നു. 

പത്രങ്ങളിൽ അഭിപ്രായങ്ങൾ പ്രകടിപ്പിക്കാനുള്ള ശരിയായ ഇടം  
എഡിറ്റോറിയലുകളാണെന്നും വാർത്താ റിപ്പോർട്ടിംഗ് വസ്തുനിഷ്ഠവും വസ്തുതാപരവുമായി തുടരണമെന്നും ഉപരാഷ്ട്രപതി പറഞ്ഞു. വാർത്താ റിപ്പോർട്ടിംഗിനെ എഡിറ്റോറിയൽ ആക്കുന്ന പ്രവണത വർദ്ധിച്ചുവരുന്നതിനെതിരെ അദ്ദേഹം മുന്നറിയിപ്പ് നൽകി. തലമുറകളായി സാമൂഹിക ഐക്യം, വിദ്യാഭ്യാസം, സംസ്കാരം, ക്രിയാത്മകമായ പൊതുസംവാദം എന്നിവ പ്രോത്സാഹിപ്പിക്കുന്നതിനും കേരളത്തിന്റെ സാഹിത്യ-സാംസ്കാരിക മേഖലയെ സമ്പന്നമാക്കുന്നതിനും ദീപികയെ അദ്ദേഹം അഭിനന്ദിച്ചു. 

മാധ്യമ രംഗത്ത് മാറിക്കൊണ്ടിരിക്കുന്ന മാറ്റങ്ങളെക്കുറിച്ച് ആശങ്ക പ്രകടിപ്പിച്ച ഉപരാഷ്ട്രപതി, തെറ്റായ വിവരങ്ങൾ, പൊതുജനവിശ്വാസം കുറയൽ, വാണിജ്യ സമ്മർദ്ദങ്ങൾ, ഡിജിറ്റൽ പ്ലാറ്റ്‌ഫോമുകൾ കൊണ്ടുവരുന്ന ദ്രുതഗതിയിലുള്ള പരിവർത്തനം എന്നിവയുടെ വർദ്ധിച്ചുവരുന്ന വെല്ലുവിളികളിലേക്ക് വിരൽ ചൂണ്ടി. വിഷയങ്ങളിലും സംവാദങ്ങളിലും ആഴത്തിൽ ഏർപ്പെടുന്നതിനുപകരം ഇന്ന് ആളുകൾ അടിക്കുറിപ്പുകളും തലക്കെട്ടുകളും കൊണ്ട് കൂടുതൽ സ്വാധീനിക്കപ്പെടുന്നുണ്ടെന്ന് അദ്ദേഹം നിരീക്ഷിച്ചു. 

സ്ഥാപനത്തിന്റെ ഭാവിയിൽ ആത്മവിശ്വാസം പ്രകടിപ്പിച്ചുകൊണ്ട്, മാധ്യമങ്ങൾക്ക് മുന്നിലുള്ള ഓരോ വെല്ലുവിളിയും ഒരവസരം കൂടി നൽകുന്നുണ്ടെന്ന് ഉപരാഷ്ട്രപതി പറഞ്ഞു. സത്യസന്ധതയുടെയും പ്രൊഫഷണലിസത്തിന്റെയും ഉയർന്ന നിലവാരം ഉയർത്തിപ്പിടിച്ചുകൊണ്ട് ദീപിക യുവ പത്രപ്രവർത്തകരെ പ്രചോദിപ്പിക്കുന്നത് തുടരുമെന്ന് അദ്ദേഹം പ്രത്യാശ പ്രകടിപ്പിച്ചു.

ദീപികയുടെ മാനേജ്‌മെന്റ്, ജീവനക്കാർ, ലേഖകർ, പരസ്യദാതാക്കൾ, വിതരണക്കാർ, വായനക്കാർ എന്നിവരെ അഭിനന്ദിച്ച ഉപരാഷ്ട്രപതി, സമൂഹത്തിനും രാഷ്ട്രത്തിനും വേണ്ടിയുള്ള സേവനത്തിൽ പത്രത്തിന് ഇനിയും നിരവധി വർഷത്തെ വിജയവും പ്രസക്തിയും മികവും ആശംസിച്ചു.

കേരളാ ഗവർണർ ശ്രീ രാജേന്ദ്ര വിശ്വനാഥ് അർലേക്കർ, കേരള മുഖ്യമന്ത്രി ശ്രീ വി ഡി സതീശൻ, കേരള നിയമസഭാ സ്പീക്കർ ശ്രീ തിരുവഞ്ചൂർ രാധാകൃഷ്ണൻ, മുൻ പശ്ചിമ ബംഗാൾ ഗവർണർ ശ്രീ സി വി ആനന്ദ ബോസ്, കോട്ടയം ആർച്ച് ബിഷപ്പ് മാർ മാത്യു മൂലക്കാട്ട്, രാഷ്ട്ര ദീപിക  ചെയർമാൻ  ശ്രീ ഫ്രാൻസിസ് ക്ലീറ്റസ്, മാനേജിംഗ് ഡയറക്ടർ ശ്രീ മൈക്കിൾ