ലഹരി രഹിതമാകാൻ അക്ഷരമുറ്റം; മാലിന്യമുക്തമാകാൻ ഐ ലവ് കോട്ടയം
കോട്ടയം ജില്ലാ പഞ്ചായത്ത് ബജറ്റ്,144.77 കോടി രൂപയുടെ വരവും 142.87 കോടി രൂപ ചെലവും പ്രതീക്ഷിക്കുന്ന ബജറ്റ്
കോട്ടയം: ലഹരി-മാലിന്യമുക്ത കോട്ടയത്തിനായി ജില്ലാ പഞ്ചായത്തിന്റെ 2025-26 വർഷത്തെ ബജറ്റ്. കാൻസർ പ്രതിരോധത്തിനും വന്യജീവി ആക്രമണം നേരിടാനും പ്രത്യേക പദ്ധതികൾ ബജറ്റിൽ ഉൾപ്പെടുത്തിയിട്ടുണ്ട്.
കാർഷിക മേഖലയുടെ വികസനം, ആരോഗ്യം, വിദ്യാഭ്യാസം, സ്വയം തൊഴിൽ, കുടിവെള്ള പദ്ധതികൾ, ക്ഷീരമേഖല, മത്സ്യകൃഷി പ്രോത്സാഹനം, മൃഗ സംരക്ഷണം, സ്ത്രീശാക്തീകരണ പദ്ധതികൾ,
സാമൂഹ്യസുരക്ഷാ പദ്ധതികൾ, ദാരിദ്ര്യലഘൂകരണം, ശുചിത്വ പദ്ധതികൾ, വനിത-ശിശു-വയോജന മേഖലാ പദ്ധതികൾ, ഭിന്നശേഷിക്കാർക്ക് സംരക്ഷണ പദ്ധതികൾ എന്നിവയ്ക്ക് ഊന്നൽ കൊടുത്തുകൊണ്ടുള്ള ബജറ്റാണ് വൈസ് പ്രസിഡന്റ് ജോസ് പുത്തൻകാലാ അവതരിപ്പിച്ചത്. നിലവിലെ ഭരണസമിതിയുടെ അഞ്ചാമത്തെ ബജറ്റാണ് അവതരിപ്പിച്ചത്.
144.77 കോടി രൂപയുടെ വരവും 142.87 കോടി രൂപ ചെലവും പ്രതീക്ഷിക്കുന്ന ബജറ്റാണ് അവതരിപ്പിച്ചത്.
'ലഹരി രഹിത അക്ഷരമുറ്റം'
ജില്ലയിലെ സർക്കാർ, എയ്ഡഡ് സ്‌കൂളുകൾ, വിദ്യാഭ്യാസ സ്ഥാപനങ്ങൾ എന്നിവ കേന്ദ്രീകരിച്ച് ലഹരി വിരുദ്ധ സന്ദേശയാത്ര സംഘടിപ്പിക്കും. സ്‌കൂളുകളിലും പൊതു ഇടങ്ങളിലും വിവിധ വകുപ്പുകളും ജില്ലാ പഞ്ചായത്തും സഹകരിച്ച് നിരീക്ഷണ ക്യാമറകൾ സ്ഥാപിക്കും. ലഹരിക്കെതിരെയുള്ള പോരാട്ടത്തിന് വിദ്യാർത്ഥികൾ, രക്ഷിതാക്കൾ, അധ്യാപകർ എന്നിവർക്ക് കൂടുതൽ കരുത്ത് പകരുന്നതിനും സമൂഹത്തിൽ അവബോധം സൃഷ്ടിക്കുന്നതിനും ജില്ലയിലെ വിവിധവകുപ്പുകൾ സഹകരണത്തോടെ ലഹരി വിമുക്ത പ്രോഗ്രാം നടപ്പാക്കും.
ഐ ലവ് കോട്ടയം
ഠമാലിന്യമുക്ത കേരളം പദ്ധതിയുടെ ഭാഗമായി കോട്ടയം ജില്ലയിൽ പൊതു ഇടങ്ങൾ സൗന്ദര്യവൽക്കരിക്കാൻ 'ഐ ലവ് കോട്ടയം' പദ്ധതി നടപ്പാക്കും. വിവാഹങ്ങളും സൽക്കാരങ്ങളും നടക്കുന്ന ഓഡിറ്റോറിയങ്ങളിലെ ഭക്ഷണമാലിന്യം സംസ്‌കരിച്ചു മൂല്യ വർദ്ധിത ഉൽപ്പന്നങ്ങൾ ആക്കി മാറ്റും. സൈപ്‌റ്റേജ് മാലിന്യം ശാസ്ത്രീയമായി സംസ്‌കരിക്കാൻ ബ്ലോക്ക്/ഗ്രാമ പഞ്ചായത്തുകളുമായി സഹകരിച്ച് മൊബൈൽ സെപ്‌റ്റേജ് ട്രീറ്റ്മെന്റ് പ്ലാന്റ് വാങ്ങി നൽകും. ഡബിൾ ചേമ്പർ ഇൻസിനേറ്റർ സ്ഥാപിക്കുന്നതിന് വിഹിതം നൽകും.
മറ്റു പ്രധാനബജറ്റ് പ്രഖ്യാപനങ്ങൾ
ഠ കെ.എം. മാണി സ്മാരക പാലാ ജനറൽ ആശുപത്രിയിൽ ക്യാൻസർ ചികിത്സാ സൗകര്യങ്ങൾ ഏർപ്പെടുത്തുന്നതിന്റെ ഭാഗമായി റേഡിയേഷൻ യൂണിറ്റ് സ്ഥാപിക്കാൻ തുക വകയിരുത്തും
ഠ സെർവിക്കൽ ക്യാൻസർ നിർമാർജനം ചെയ്യുന്നതിനായി ഒൻപതു മുതൽ 14 വയസ് വരെയുള്ള വിദ്യാർഥിനികൾക്കായി വാക്‌സിൻ നൽകുന്നതിനായി 'ക്യാൻ റൈസ്' എന്ന പേരിൽ സെർവിക്കൽ ക്യാൻസർ നിർമാർജന യജ്ഞം നടപ്പാക്കും.
ഠ ജില്ലയിലെ താലൂക്ക് ആശുപത്രികളിൽ ഡയാലിസിസ് സൗകര്യം ഏർപ്പെടുത്താനുള്ള നടപടികൾ സ്വീകരിക്കും.
ഠ മുൻ എം.എൽ.എ. കാനം രാജേന്ദ്രന്റെ സ്്മരണാർഥം സി.പി.ആർ. പരിശീലന പരിപാടി നടപ്പാക്കും. പൊതുജനങ്ങൾക്കും ഡ്രൈവർമാർക്കും വിദ്യാർഥിനികൾക്കും ജനപ്രതിനിധികൾക്കും ആശാ വർക്കർമാർക്കും പരിശീലനം നൽകും.
ഠ വന്യജീവി സംഘർഷം ലഘൂകരിക്കുന്നതിനായി പ്രശ്‌നം നേരിടുന്ന ഗ്രാമപഞ്ചായത്തുകളിൽ ഡ്രോൺ നിരീക്ഷണം ഉൾപ്പെടെയുള്ള സംവിധാനങ്ങൾ ഒരുക്കും. ജില്ലാ പഞ്ചായത്ത് പ്രസിഡന്റിന്റെ നേതൃത്വത്തിൽ ജാഗ്രതാ സമിതി രൂപീകരിക്കും.
ഠ റബർ മേഖലയ്ക്കായി ആർ.പി.എസ്. സൊസൈറ്റി മുഖേന നിർമിക്കുന്ന ഉൽപന്നങ്ങൾക്കു സബ്സിഡി നൽകുന്ന പദ്ധതി നടപ്പാക്കും. റബർ കൊണ്ടുള്ള ഗ്രോ ബാഗ് നിർമിക്കുന്നതിന് സബ്സിഡി നൽകും.
ഠ തരിശ്‌നില കൃഷിക്ക് സബ്സിഡി ജില്ലാ പഞ്ചായത്ത് വിഹിതമായി നൽകും. സ്ഥിര മായി നെൽകൃഷി ചെയ്യുന്ന കർഷകർക്ക് സബ്സിഡി അനുവദിക്കും. പാടശേഖരങ്ങളുടെ അടിസ്ഥാന സൗകര്യവികസനത്തിന് സോളാർ പമ്പിനും ട്രാൻസ്‌ഫോർമർ വെർട്ടിക്കൽ ആക്‌സിയൽ ഫ്‌ളോ പമ്പ് സ്ഥാപിക്കുന്നതിനും തുക വകയിരുത്തും. മണ്ണ് പരിശോധനയ്ക്കായി മൊബൈൽ മണ്ണു പരിശോധനാലാബ് സജ്ജമാക്കും.
ഠ ക്ഷീരകർഷകർക്ക് റിവോൾവിംഗ് ഫണ്ട് നൽകും. കാലിത്തീറ്റ സബ്സിഡി, മിൽക്ക് ഇൻസെന്റീവ്, ക്ഷീരകർഷകർക്ക് ഇൻഷുറൻസ് എന്നിവ നടപ്പാക്കും.
ഠ മത്സ്യത്തൊഴിലാളി സഹകരണ സംഘങ്ങൾക്ക് മത്സ്യ കുഞ്ഞുങ്ങളെ വിതരണം ചെയ്യുന്ന പദ്ധതി നടപ്പാക്കും. വീട്ടുവളപ്പിലെ പടുതാക്കുളത്തിലെ മത്സ്യകൃഷിക്കും സഹായം നൽകും. പൊതുജലാശയങ്ങളിൽ മത്സ്യക്കുഞ്ഞുങ്ങളെ നിക്ഷേപിക്കും.
ഠ കോഴാ ഭക്ഷ്യ സംസ്‌കരണ കേന്ദ്രത്തിന്റെ നിർമ്മാണം പൂർത്തീകരിച്ച് നാടിനായി സമർപ്പിക്കും. മൂല്യവർധിത ഉൽപന്നങ്ങളിൽ താൽപര്യമുള്ള ഗ്രൂപ്പുകൾക്ക് ഈ കേന്ദ്രത്തിൽ സംവിധാനം ഒരുക്കും.
ഠ സ്റ്റാർട്ടപ്പ് മേഖലയിലെ സംരംഭങ്ങൾക്കും വനിതാ വ്യവസായ സംരംഭങ്ങൾക്കുമായി ഇൻകുബേഷൻ സെന്റർ തുടങ്ങും.
ഠ വിജ്ഞാന വ്യവസ്ഥ കെട്ടിപ്പടുക്കുന്നതിനായി ജില്ലാ പഞ്ചായത്തിന്റെ നേതൃത്വത്തിൽ നൈപുണ്യവികസന പരിശീലന പദ്ധതി 'വഴികാട്ടി' എന്ന പേരിൽ സംഘടിപ്പിക്കും
ഠ ഫാം ടൂറിസവും ഗ്രാമീണ ടൂറിസവും പ്രോത്സാഹിപ്പിക്കും. ഗ്രാമീണ ടൂറിസം പദ്ധതികൾക്ക് ധനസഹായം നൽകും. ജില്ലാ ഫാം കോഴ കേന്ദ്രമാക്കി ഫാം ടൂറിസം രംഗത്ത് മുന്നേറ്റം കൊണ്ട് വരുന്നതിലേക്കായി ഫാം ഫെസ്റ്റ് നടത്തുന്നതിനും, എസ്.എസ്.എഫ്. കോഴയുടെയും വാലാച്ചിറയുടെയും സൗന്ദര്യവൽക്കരണത്തിനു തുക നീക്കി വച്ചു.
ഠ തെരുവുനായശല്യം നിയന്ത്രിക്കുന്നതിന് ബ്‌ളോക്ക് തലത്തിൽ രണ്ട് എ.ബി.സി. സെന്ററും ഇതിന്റെ ഭാഗമായി രണ്ടു മൊബൈൽ വെറ്ററിനറി യൂണിറ്റും ജില്ലയിൽ ഒരു കേന്ദ്രത്തിൽ പെറ്റ് ഗ്രൂമിങ് സെന്ററും ജില്ലാ വെറ്ററിനറി കേന്ദ്രത്തിൽ വെറ്റിറനറി മെഡിക്കൽ സ്‌റ്റോറും സ്ഥാപിക്കും. വെറ്ററിനറി മേഖലയിൽ ക്രിമേഷൻ സെന്റർ സ്ഥാപിക്കും.
ഠ എല്ലാ ഡിവിഷനുകളിലും വനിതാ ഫിറ്റ്‌നെസ് സെന്റർ/ഓപ്പൺ ജിം ആരംഭിക്കും. തദ്ദേശ സ്ഥാപനങ്ങളുമായി ചേർന്നു കുട്ടികളുടെ പാർക്കുകൾ സ്ഥാപിക്കും.
ഠ മുൻമുഖ്യമന്ത്രി ഉമ്മൻചാണ്ടിയുടെ സ്മരണാർഥം 'കരുതൽ' പദ്ധതി നടപ്പാക്കും. സാമ്പത്തികമായി പിന്നോക്കം നിൽക്കുന്ന ഗുണഭോക്താക്കൾക്ക് ഇലക്ട്രിക് വീൽചെയറുകളും സ്‌കൂട്ടർ വിത്ത് സൈഡ് വീലും, കേൾവി ശക്തി സഹായക ഉപകരണങ്ങളും വിതരണം ചെയ്യും. ആവശ്യമായ കുട്ടികൾക്ക് കോക്ലിയർ ഇംപ്ലാന്റേഷൻ ശസ്ത്രക്രിയ ചെയ്യുന്നതിനുള്ള പദ്ധതി നടപ്പാക്കും. സാമൂഹ്യനീതി വകുപ്പുമായി ചേർന്ന് ഭിന്നശേഷിക്കാർക്ക് ജില്ലയിൽ ഫെസിലിറ്റേഷൻ സെന്റർ ഒരുക്കും.
ഠ ഓട്ടിസം ബാധിതർക്കായി തെറപ്പി സെന്റർ, ഓട്ടിസം പാർക്ക്, മൾട്ടി സെൻസറി റൂം സ്ഥാപിക്കാൻ തുക വകയിരുത്തും.
ഠ ഭിന്നശേഷിക്കാരിയായ കുട്ടികളുടെ അമ്മമാർക്ക് സ്വയം തൊഴിൽ പ്രദാനം ചെയ്യാൻ
/സംരംഭം തുടങ്ങാൻ സഹായം നൽകും. ഭിന്നശേഷിക്കാർക്കു ഗ്രൂപ്പ് സംരംഭങ്ങൾ തുടങ്ങാൻ പദ്ധതി നടപ്പാക്കും.
ഠ മുൻ ജില്ലാ പഞ്ചായത്തംഗം എ.വി. റസലിന്റെ സ്മരണാർഥം ജില്ലയിലെ വിവിധ സ്‌കൂളുകളിലും പൊതുഇടങ്ങളിലും കളിക്കളങ്ങൾ സ്ഥാപിക്കും. കായിക അധ്യാപകർ നിലവില്ലാത്ത സ്‌കൂളുകളിൽ കായിക അധ്യാപകരെ നിയമിക്കുന്നതിനും സ്‌കൂളുകൾക്കും ക്ലബുകൾക്കും സ്‌പോർട്‌സ് കിറ്റ്് വാങ്ങി നൽകാനും പദ്ധതി ലക്ഷ്യമിടുന്നു. കളിക്കളം പദ്ധതിയിയിലൂടെ ടർഫുകൾ നിർമിച്ചു നൽകും.
ഠ ജില്ലാ പഞ്ചായത്ത് ഏറ്റെടുത്ത സ്‌കൂളുകളിൽ അത്യാധുനികമായ സയൻസ് ലാബ്/കംപ്യൂട്ടർ ലാബ് സൗകര്യങ്ങൾ ഏർപ്പെടുത്തും. കമ്യൂണിക്കേറ്റീവ് ഇംഗ്‌ളീഷിൽ പ്രാവീണ്യം നേടുന്നതിനുളള ഇംഗ്ലീഷ് ലാബും നടപ്പിലാക്കും. വിദ്യാർഥിനികളിലെ എച്ച്.ബി. കുറവ് നികത്താൻ പദ്ധതി നടപ്പാക്കും. നേത്രപ്രശ്‌നങ്ങൾ പരിഹരിക്കാൻ ''തെളിമ'' എന്ന പേരിലും ദന്തപ്രശ്‌നങ്ങൾ പരിഹരിക്കാൻ 'സ്‌മൈൽ' എന്ന പേരിലും പദ്ധതികൾ നടപ്പാക്കും. എ.ഐ. സാങ്കേതികവിദ്യ ഉപയോഗിക്കുന്നതിന് അധ്യാപകരെ നിയോഗിക്കും. വിദ്യാർഥികൾക്കു സ്‌കൂളുകളിൽ നീന്തൽ പരിശീലനവും/ ലൈഫ് സ്‌കിൽ പരിശീലനവും നൽകും. 'കവചം'' എന്ന പദ്ധതിയിലൂടെ വിദ്യാർത്ഥിനികൾക്കായി കായിക പ്രതിരോധ പരിശീലനം നൽകും. പഠനനിലവാരം ഉയർത്തുന്നതിനായി പ്രത്യേക പരിശീലന പദ്ധതി നടപ്പാക്കും.
ഠ ജില്ലാ ആശുപത്രിയിൽ ട്രാൻസ്‌ജെൻഡർ വിഭാഗങ്ങൾക്കായി ഷെൽറ്റർ ഹോം/കം ഫർട്ട് സ്റ്റേഷൻ സ്ഥാപിക്കും. ഈ വിഭാഗത്തിന് തൊഴിൽ സംരംഭങ്ങൾ തുടങ്ങാ നുള്ള സഹായം നൽകും.
ഠ ജില്ലാതല വയോജന മേള സംഘടിപ്പിക്കും. വയോജനങ്ങൾക്കുള്ള പദ്ധതികൾക്കായി വിവരശേഖരണം നടത്താൻ ഡാറ്റാബാങ്ക് തയാറാക്കും. വയോജനങ്ങൾക്കായി പാർക്കും തുടങ്ങും.
ഠ ഡിജിറ്റൽ സാക്ഷരത പ്രവർത്തനങ്ങളുടെ ഭാഗമായി വയോജനങ്ങൾക്കും വീട്ടമ്മമാർക്കും കുടുംബശ്രീ അംഗങ്ങൾക്കും പരിശീലനം നൽകും.
ഠ ഒരു പ്രദേശത്ത് പൊതു അടുക്കള എന്ന രൂപത്തിൽ കുടുംബശ്രീ വനിതകൾക്കായി ഒരു പുതിയ സംരംഭം തുടങ്ങും. ഓൺലൈൻ ഭക്ഷണവിതരണം ആപ്പ് മുഖാന്തിരം നടത്തും. 'കുടുംബശ്രീ കഫെ' എന്ന പേരിൽ കുടുംബശ്രീ വനിതകൾക്കായി ഫുഡ് കിയോസ്‌കുകൾ തുടങ്ങാൻ സഹായം നൽകും. കുറവിലങ്ങാട് കോഴയിൽ ഉഴവൂർ ബ്‌ളോക്ക് പഞ്ചായത്തിന്റെ സഹകരണത്തോടുകൂടി സ്ഥാപിച്ചിരിക്കുന്ന കെ.എം. മാണി തണൽ വിശ്രമകേന്ദ്രത്തിൽ കുടുംബശ്രീ പ്രീമിയം കഫേ സ്ഥാപിക്കും.
ഠ ശ്മശാനം ഇല്ലാത്ത പഞ്ചായത്തുകളിൽ സ്ഥലം ലഭ്യമായിടത്ത് പൊതുശ്മശാനം / കിമിറ്റോറിയം നിർമിക്കുന്നതിനായി വിഹിതം നൽകും.
ഠ വിവാഹപൂർവ കൗൺസിലിംഗ് നടത്തുന്നതിന് കൗൺസിലേഴ്‌സിനെ നിയമിക്കും. കമ്മ്യൂണിറ്റി വിമൻ ഫെസിലിറ്റേറ്ററിന്റെ പ്രവർത്തനത്തിന് ആവശ്യമായ തുക വകയിരുത്തും.
ഠ ഗവൺമെന്റ് കൊമേഴ്‌സ് ഇൻസ്റ്റിറ്റ്യൂട്ടുകളിലെ പുതുക്കിയ പാഠ്യപദ്ധതിക്കായി കമ്പ്യൂട്ടർ ലാബ് സജ്ജമാക്കുന്നതിനും കണ്ടിജൻസി ചെലവുകൾക്കും തുക അനുവദിക്കും. കോട്ടയം ജില്ലാ ജനറൽ ആശുപത്രിയിൽ വിവിധ വാർഡുകളുടെ അലൂമിനിയം റൂഫ് എക്സ്റ്റൻഷൻ, റൂഫ് നിർമ്മിക്കൽ, മരുന്നു വാങ്ങൽ, പാലിയേറ്റീവ് കെയർ, ക്യാൻ കോട്ടയം, എ.എൽ.എസ്. ആംബുലൻസ് വാങ്ങൽ എന്നിവയ്ക്കു തുക അനുവദിക്കും.
ഠ ഭാരതീയ ചികിത്സ വകുപ്പിൽ പാലിയേറ്റീവ് പദ്ധതിക്കായും പാലിയേറ്റീവ് വാഹനം വാങ്ങുന്നതിനായും, മരുന്നു വാങ്ങുന്നതിനും തുക അനുവദിക്കും. ജില്ലാ ഹോമിയോ ആശുപത്രിയിൽ പെയിന്റിംഗ്, ഒബ്‌സർവേഷൻ റൂം തുടങ്ങിയവ അലൂമിനിയം ഫാബ്രിക്കേഷൻ ഉപയോഗിച്ച് തരംതിരിക്കൽ, സെക്യൂരിറ്റി ജീവനക്കാരെ ഏർപ്പെടുത്തൽ, മരുന്നുവാങ്ങൽ തുടങ്ങിയവയ്ക്കു തുക നീക്കിവച്ചു.
ആർപിഎഫ് മണർകാടിനായി പേരന്റ് സ്റ്റോക്ക് വാങ്ങുന്നതിനും, അഡ്മിനിസ്‌ട്രേറ്റീവ് ബ്ലോക്ക് നിർമ്മാണം, റീടൈനിംഗ് വാൾ നിർമ്മാണം തുടങ്ങിയ ഇനങ്ങളിൽ തുക നീക്കിവെക്കും. ജില്ലാ പഞ്ചായത്തിന് വിട്ടു കിട്ടിയിരിക്കുന്ന മുഴുവൻ സ്ഥാപനങ്ങളിലും അറ്റകുറ്റപ്പണിക്കും കണ്ടിജൻസി ചിലവിനും മറ്റു ആവശ്യങ്ങൾക്കുമായി ഫണ്ട് മാറ്റിവയ്ക്കും.
ഫോട്ടോക്യാപ്ഷൻ:
കോട്ടയം ജില്ലാ പഞ്ചായത്തിന്റെ വാർഷിക ബജറ്റ് വൈസ് പ്രസിഡന്റ് ജോസ് പുത്തൻകാലാ അവതരിപ്പിക്കുന്നു.
