കൊച്ചി മെട്രോ രണ്ടാംഘട്ടം: നിർമാണം ഉടൻ തുടങ്ങും

ടെസ്റ്റ് പൈലിങ് നടത്തുന്നതിനുള്ള സ്ഥലവും അതിന്റെ തീയതിയുമെല്ലാം അടുത്ത ദിവസം പ്രഖ്യാപിക്കും. കാസ്റ്റിങ് യാർഡിനായി കണ്ടെത്തിയത് എച്ച്.എം.ടി.യുടെ സ്ഥലമാണ്. ഈ സ്ഥലം ഏറ്റെടുക്കും. 11.2 കിലോമീറ്റർ നീളമുള്ള രണ്ടാംഘട്ട റൂട്ടിൽ 11 സ്റ്റേഷനുകളാണ് വരുന്നത്. ഈ റൂട്ടിൽ കെ.എം.ആർ.എല്ലിന്റെ നേതൃത്വത്തിൽ മുന്നൊരുക്ക പ്രവർത്തനങ്ങൾ നടക്കുന്നുണ്ട്.റോഡിന്റെ മധ്യത്തിൽ ബാരിക്കേഡ് ചെയ്തുള്ള നിർമാണം ആരംഭിക്കുന്നതിനു മുൻപ് ഗതാഗത ക്രമീകരണം പൂർത്തിയാക്കണം. പ്രധാന റോഡിൽ നിർമാണം നടക്കുമ്പോൾ യാത്രക്കാർക്ക് ആശ്രയിക്കാവുന്ന ബദൽ റോഡുകൾ കണ്ടെത്തിയിട്ടുണ്ട്. ഗതാഗതം ഇതുവഴി തിരിച്ചുവിടും.രണ്ടാംഘട്ടത്തിന് 1957 കോടി രൂപയാണ് ചെലവ് കണക്കാക്കുന്നത്. വായ്പാ ഏജൻസിയായ ഏഷ്യൻ ഇൻഫ്രാസ്ട്രക്ചർ ഇൻവെസ്റ്റ്‌മെന്റ് ബാങ്കിൽനിന്ന് 1018 കോടി രൂപയാണ് വായ്പ എടുക്കാൻ ഉദ്ദേശിക്കുന്നത്. സിവിൽ നിർമാണ പ്രവർത്തനങ്ങൾക്ക് ഈ തുക ഉപയോഗപ്പെടുത്തും. പദ്ധതിയിൽ കേന്ദ്രത്തിന്റെ വിഹിതം 339 കോടി രൂപയും സംസ്ഥാന സർക്കാരിന്റെ വിഹിതം 556 കോടിയുമാണ് കണക്കാക്കിയിരിക്കുന്നത്.