ആദിവാസി യുവജന സാംസ്കാരിക വിനിമയ പരിപാടി: മത്സര വിജയികൾക്ക് സമ്മാനം വിതരണം ചെയ്തു.

തിരുവനന്തപുരം : 2025 ഫെബ്രുവരി 10കേന്ദ്ര യുവജനകാര്യ കായിക മന്ത്രാലയത്തിന് കീഴിലുള്ള നെഹ്റു യുവ കേന്ദ്രയുടെ ആഭിമുഖ്യത്തിൽ തിരുവനന്തപുരത്ത് നടന്ന ആദിവാസി യുവജന വിനിമയ പരിപാടിയിൽ പ്രസംഗ മത്സര വിജയികൾക്കുള്ള സമ്മാനം ശ്രീ ശശി തരൂർ എം പി വിതരണം ചെയ്തു.ഒന്നാം സ്ഥാനം മനോജ്‌ ബാഗ് , (കലഹണ്ടി ജില്ല ഒഡിഷ )രണ്ടാം സ്ഥാനം  സ്വദിൻ ഹരിജൻ,(കലഹണ്ടി ജില്ല ഒഡിഷ) മൂന്നാം സ്ഥാനം വിരേന്ദ്ര ഉയ്ക്കെ (ഗഡ്‍ച്റോളി മഹാരാഷ്ട്ര) എന്നിവരാണ് ജേതാക്കൾ. ക്യാഷ് അവാർഡും ട്രോഫിയും സർട്ടിഫിക്കറ്റും അടങ്ങുന്നതാണ് പുരസ്കാരം. പരിപാടിയിൽ പങ്കെടുത്തവരുമായി ശ്രീ.ശശി തരൂർ ആശയവിനിമയം നടത്തി.ആദിവാസി മേഖലകളിലെ പിന്നോക്കാവസ്ഥ  മാറണമെങ്കിൽ എല്ലാവരിലേക്കും വിദ്യാഭ്യാസം എത്തണമെന്ന് അദ്ദേഹം അഭിപ്രായപ്പെട്ടു. ഏതു ചൂഷണവും അറിവില്ലായ്മ കൊണ്ട് ഉണ്ടാവുന്നതാണെന്നും, അത് മറികടക്കാൻ അറിവ് നേടണമെന്നും അദ്ദേഹം കൂട്ടിച്ചേർത്തു.നെഹ്റു യുവ കേന്ദ്ര സംഘാതൻ സ്റ്റേറ്റ് ഡയറക്ടർ ശ്രീ. എം. അനിൽകുമാർ ചടങ്ങിൽ അധ്യക്ഷത വഹിച്ചു. ആദിവാസി യുവജന സാംസ്കാരിക വിനിമയ പരിപാടിയുടെ ഭാഗമായി തലസ്ഥാനത്തെത്തിയ സംഘാംഗങ്ങൾ നിയമസഭയിൽ ബജറ്റ്‌ അവതരണം നേരിൽ കണ്ടു. ശ്രീപദ്‌മനാഭസ്വാമി ക്ഷേത്രം, വിക്രം സാരാഭായി സ്പേസ് സെന്റർ, കാര്യവട്ടം സായി റീജിയണൽ സെന്റർ, വിഴിഞ്ഞം തുറമുഖം, തുടങ്ങിയ സ്ഥലങ്ങളും സന്ദർശിച്ചു.  സംഘാംഗങ്ങൾക്കായി ഗുരുകൃപ നാടൻ കലാസമിതി ചുള്ളിമാനൂർ ചരടുപിന്നിക്കളി  അവതരിപ്പിച്ചു. ജില്ലാ കളരിപ്പയറ്റ് അസോസിയേഷൻ്റെ കളരിപ്പയറ്റ് അവതരണവും നടന്നു. ശ്രീ. കെ എ ഷാജി, ഡോ . ഗോപകുമാർ, ശ്രീ ജയകുമാർ  പള്ളിപ്പുറം എന്നിവർ ക്ലാസ്സുകൾ നയിച്ചു.കേന്ദ്ര ആഭ്യന്തര മന്ത്രാലയം ,യുവജന കാര്യ കായിക മന്ത്രാലയം മേരാ യുവ ഭാരത് , നെഹ്റു യുവ കേന്ദ്ര സംഘാതൻ എന്നിവ സംയുക്തമായി സംഘടിപ്പിക്കുന്ന ആദിവാസി യുവജന സാംസ്കാരിക വിനിമയ പരിപാടി ഫെബ്രുവരി 3  മുതൽ  9  വരെ തിരുവനന്തപുരം കൈമനത്തുള്ള റീജിയണൽ ടെലികോം ട്രെയിനിങ് സെൻ്ററിലാണ്  സംഘടിപ്പിച്ചത്.