സന്തോഷ്‌ ട്രോഫി നവംബർ 20 മുതൽ 24 വരെ
സന്തോഷ്‌ ട്രോഫി നവംബർ 20 മുതൽ 24 വരെ ; യോഗ്യതാ റൗണ്ട്‌ കോഴിക്കോട്ട്‌
കൊച്ചി : സന്തോഷ്‌ ട്രോഫി ഫുട്‌ബോൾ യോഗ്യതാമത്സരങ്ങൾ നവംബർ 20 മുതൽ 24 വരെ കോഴിക്കോട്‌ കോർപറേഷൻ ഇ എം എസ്‌ സ്‌റ്റേഡിയത്തിൽ. കേരളം ഉൾപ്പെടുന്ന ഗ്രൂപ്പ്‌ എച്ച്‌ പോരാട്ടങ്ങളാണ്‌ നടക്കുക. റെയിൽവേസ്‌, പുതുച്ചേരി, ലക്ഷദ്വീപ്‌ എന്നിവയാണ്‌ മറ്റു ടീമുകൾ. ഗ്രൂപ്പ്‌ ചാമ്പ്യൻമാർ ഡിസംബറിൽ ഹൈദരാബാദിൽ നടക്കുന്ന ഫൈനൽ റൗണ്ടിലേക്ക്‌ യോഗ്യത നേടും. 12 ടീമുകളാണ്‌ അന്തിമറൗണ്ടിൽ. കേരളത്തിന്റെ പരിശീലന ക്യാമ്പിന്‌ നാളെ തുടക്കമാകും. 30 താരങ്ങളാണ്‌ ആദ്യഘട്ടക്യാമ്പിൽ. കോർപറേഷൻ സ്‌റ്റേഡിയത്തിലാണ്‌ പരിശീലനം.
ഏഴുതവണ ചാമ്പ്യൻമാരായ കേരളത്തിന്‌ അവസാന രണ്ട്‌ സീസണിലും സെമി കാണാനായിട്ടില്ല. ഇത്തവണ എട്ടാംകിരീടം ലക്ഷ്യമിട്ടാണ്‌ തയ്യാറെടുപ്പ്‌. ബിബി തോമസാണ്‌ പരിശീലകൻ. ഹാരി ബെന്നി സഹപരിശീലകനും. എം വി നെൽസൺ ഗോൾകീപ്പർ കോച്ചുമാണ്‌. സംസ്ഥാന സീനിയർ ചാമ്പ്യൻഷിപ്പിൽനിന്ന്‌ തെരഞ്ഞെടുത്തവരും കേരള പൊലീസിൽനിന്നുള്ള താരങ്ങളുമാണ്‌ ആദ്യഘട്ട ക്യാമ്പിൽ. വൈകാതെ ഇത്‌ വിപുലീകരിക്കും.
