ആമയിഴഞ്ചാന് തോട്ടിലെ മാലിന്യം; അടിയന്തര യോഗം വിളിച്ച് മുഖ്യമന്ത്രി
18 വ്യാഴാഴ്ച രാവിലെ 11:30ന് ഓണ്ലൈന് ആയാണ് യോഗം ചേരുക.
![ആമയിഴഞ്ചാന് തോട്ടിലെ മാലിന്യം; അടിയന്തര യോഗം വിളിച്ച് മുഖ്യമന്ത്രി](https://akshayanewskerala.in/uploads/images/202405/image_870x_6634a78731597.jpg)
തിരുവനന്തപുരം : ആമയിഴഞ്ചാന് തോടിന്റെ റെയില്വേ സ്റ്റേഷനടിയില് കൂടി പോകുന്ന ഭാഗത്ത് മാലിന്യം കുന്നുകൂടി കിടക്കുന്നത് മൂലമുള്ള വിവിധ പ്രശ്നങ്ങളില് സ്വീകരിക്കേണ്ട നടപടികള് ചര്ച്ചചെയ്യാന് മുഖ്യമന്ത്രി പിണറായി വിജയന് അടിയന്തര യോഗം വിളിച്ചു.
18 വ്യാഴാഴ്ച രാവിലെ 11:30ന് ഓണ്ലൈന് ആയാണ് യോഗം ചേരുക. തദ്ദേശ സ്വയംഭരണം, പൊതുമരാമത്ത്, തൊഴില്, ഭക്ഷ്യം, കായികം -റെയില്വേ, ആരോഗ്യം, ജലവിഭവം വകുപ്പ് മന്ത്രിമാരും ബന്ധപ്പെട്ട എംഎല്എമാരും തിരുവനന്തപുരം മേയറും പങ്കെടുക്കും. ചീഫ് സെക്രട്ടറി ഉള്പ്പെടെയുള്ള ഉന്നത ഉദ്യോഗസ്ഥരും റെയില്വേ ഡിവിഷണല് മാനേജരും യോഗത്തിലുണ്ടാകും.
ഈ പ്രദേശത്ത് മാലിന്യം കുന്നുകൂടുന്നത് വെള്ളത്തിന്റെ ഒഴുക്ക് തടയപ്പെടുകയും തമ്പാനൂരിലും പരിസരത്തും വെള്ളക്കെട്ടുണ്ടാകുന്നതിനും ഇടയാക്കുന്നുണ്ട്. രോഗാണുക്കള് പെരുകി ഗുരുതരമായ ആരോഗ്യപ്രശ്നങ്ങള്ക്കും കാരണമാവുന്ന സാഹചര്യത്തിലാണ് യോഗം.