പ്രേക്ഷകര്‍ കാത്തിരിക്കുന്ന മോഹന്‍ലാല്‍-പൃഥ്വിരാജ്-മുരളിഗോപി ചിത്രം എമ്പുരാന്റെ ടീസര്‍ തീം പുറത്ത്.
ചിത്രത്തിന്റെ ടീസര്‍ കഴിഞ്ഞദിവസം പുറത്തിറക്കിയിരുന്നു. മാര്‍ച്ച് 27-നാണ് 'എല്‍2: എമ്പുരാന്‍' തിയേറ്ററുകളിലെത്തുന്നത്.
പ്രേക്ഷകര്‍ കാത്തിരിക്കുന്ന മോഹന്‍ലാല്‍-പൃഥ്വിരാജ്-മുരളിഗോപി ചിത്രം എമ്പുരാന്റെ ടീസര്‍ തീം പുറത്ത്. ചിത്രത്തിന്റെ സംവിധായകനായ പൃഥ്വിരാജ് ഉള്‍പ്പെടെയുള്ളവര്‍ സാമൂഹികമാധ്യമങ്ങളിലൂടെ ടീസര്‍ തീം പങ്കുവെച്ചു. ചിത്രത്തിന്റെ ടീസര്‍ കഴിഞ്ഞദിവസം പുറത്തിറക്കിയിരുന്നു. മാര്‍ച്ച് 27-നാണ് 'എല്‍2: എമ്പുരാന്‍' തിയേറ്ററുകളിലെത്തുന്നത്.2019-ല്‍ ഇറങ്ങിയ സൂപ്പര്‍ഹിറ്റ് ചിത്രം ലൂസിഫറിന്റെ രണ്ടാംഭാഗമാണ് 'എല്‍2: എമ്പുരാന്‍'. ജനുവരി 26-ന് നടന്ന ചടങ്ങില്‍ നടന്‍ മമ്മൂട്ടിയാണ് ചിത്രത്തിന്റെ ടീസര്‍ പുറത്തിറക്കിയത്. വന്‍താരനിരയാണ് ടീസര്‍ ലോഞ്ചിനെത്തിയിരുന്നത്.എട്ട് സംസ്ഥാനങ്ങളിലും നാല് രാജ്യങ്ങളിലുമായി 14 മാസം കൊണ്ടാണ് എമ്പുരാന്‍ ചിത്രീകരണം പൂര്‍ത്തിയാക്കിയത്. ചിത്രത്തില്‍ മോഹന്‍ലാല്‍, പൃഥ്വിരാജ്, ടൊവിനോ എന്നിവര്‍ക്ക് പുറമേ മഞ്ജു വാര്യര്‍, സുരാജ് വെഞ്ഞാറമ്മൂട്, ഇന്ദ്രജിത്ത്, ഫാസില്‍, സാനിയ ഇയ്യപ്പന്‍, നൈല ഉഷ, അര്‍ജുന്‍ ദാസ് തുടങ്ങി വമ്പന്‍ താരനിരയാണ് അണിനിരക്കുന്നത്. ഫ്രഞ്ച് നടന്‍ എറിക് എബൗനി, ബ്രിട്ടീഷ് നടി ആന്‍ഡ്രിയ തിവദാര്‍ എന്നിവര്‍ ഉള്‍പ്പെടെയുള്ള വിദേശതാരങ്ങളും ചിത്രത്തില്‍ എത്തുന്നുവെന്നാണ് വിവരം.ചിത്രത്തില്‍ ടൊവിനോ തോമസ് അവതരിപ്പിക്കുന്ന ജതിന്‍ രാംദാസ് എന്ന കഥാപാത്രത്തിന്റെ ക്യാരക്ടര്‍ പോസ്റ്റര്‍ നേരത്തേ പുറത്തുവന്നിരുന്നു. ടൊവിനോയുടെ ജന്മദിനമായ ജനുവരി 21-ന് 'പവര്‍...ഇസ് ആന്‍ ഇല്യൂഷന്‍!' (അധികാരമെന്നതൊരു മിഥ്യയാണ്) എന്ന ടാഗ് ലൈനോടെയാണ് പോസ്റ്റര്‍ പുറത്തിറങ്ങിയത്. കേരളത്തിന്റെ മുഖ്യമന്ത്രിയായി ചിത്രത്തില്‍ മുഴുനീള വേഷമാണ് ടൊവിനോയ്ക്ക് എന്നാണ് വിവരം. കഴിഞ്ഞവര്‍ഷം മോഹന്‍ലാലിന്റെ ജന്മദിനമായ മേയ് 21-നാണ് എമ്പുരാനിലെ മോഹന്‍ലാലിന്റെ കഥാപാത്രമായ എബ്രാം ഖുറേഷിയുടെ ആദ്യ പോസ്റ്റര്‍ പുറത്തുവന്നത്. സ്‌റ്റൈലിഷ് ലുക്കിലുള്ള അബ്രാം ഖുറേഷിയ്ക്ക് വന്‍ വരവേല്‍പ്പാണ് ആരാധകര്‍ നല്‍കിയത്.
