വിഴിഞ്ഞത്ത് ചരിത്രമുഹൂര്ത്തം : വാട്ടര്സല്യൂട്ടോടെ ആദ്യ ചരക്കുകപ്പലായ 'സാൻ ഫെർണാണ്ടോ'യ്ക്ക് സ്വീകരണം
കേരളത്തിന്റെ ഭാവിവികസനസ്വപ്നം യാഥാര്ഥ്യമാക്കി വിഴിഞ്ഞം തുറമുഖത്തേക്കുള്ള ആദ്യചരക്കുകപ്പല് എത്തി
![വിഴിഞ്ഞത്ത് ചരിത്രമുഹൂര്ത്തം : വാട്ടര്സല്യൂട്ടോടെ ആദ്യ ചരക്കുകപ്പലായ 'സാൻ ഫെർണാണ്ടോ'യ്ക്ക് സ്വീകരണം](https://akshayanewskerala.in/uploads/images/202407/image_870x_668f7375830d8.jpg)
തിരുവനന്തപുരം: കേരളത്തിന്റെ ഭാവിവികസനസ്വപ്നം യാഥാര്ഥ്യമാക്കി വിഴിഞ്ഞം അന്താരാഷ്ട്ര തുറമുഖം പ്രവര്ത്തനസജ്ജമാകുന്നു. തുറമുഖത്തേക്കുള്ള ആദ്യചരക്കുകപ്പല് എത്തി. വാട്ടര് സല്യൂട്ടോടെ ലോകത്തെ രണ്ടാമത്തെ വലിയ കപ്പല് കമ്പനിയായ മെസ്കിന്റെ സാന് ഫെര്ണാണ്ഡോയെന്ന കപ്പലിനെ സ്വീകരിച്ചു. കണ്ടെയ്നറുകളുമായാണ് കപ്പലെത്തിയത്.
വെള്ളിയാഴ്ച രാവിലെ 10-ന് തുറമുഖത്ത് നടക്കുന്ന ചടങ്ങില് മുഖ്യമന്ത്രി പിണറായി വിജയന് ചരക്കുകപ്പലിന് ഔദ്യോഗികസ്വീകരണം നല്കും. കേന്ദ്ര തുറമുഖവകുപ്പ് മന്ത്രി സര്ബാനന്ദ സോനോവാള് മുഖ്യാതിഥിയാകും. അദാനി ഗ്രൂപ്പ് ഡയറക്ടര് കരണ് അദാനിയും പങ്കെടുക്കും.ചൈനയില് നിന്നെത്തിക്കുന്ന കണ്ടെയ്നറുകള് അടുത്ത ദിവസങ്ങളില് തുറമുഖത്തെത്തുന്ന കപ്പലുകളില് മുംബൈ, കൊല്ക്കത്ത എന്നിവിടങ്ങളിലേക്ക് കൊണ്ടുപോകും. ട്രയല് റണ്ണിന്റെ ഭാഗമായി സെപ്റ്റംബര്വരെ തുടര്ച്ചയായി ചരക്കുകപ്പലുകള് എത്തും. മൂന്നുമാസത്തിനുള്ളില് തുറമുഖത്തിന്റെ വാണിജ്യപ്രവര്ത്തനങ്ങളുടെ ഉദ്ഘാടനം നടക്കും.രാജ്യത്തെ ആദ്യത്തെ ട്രാന്സ്ഷിപ്മെന്റ് തുറമുഖമാണ് വിഴിഞ്ഞത്ത് യാഥാര്ഥ്യമാകുന്നത്. പി.പി.പി. മാതൃകയില് 7700 കോടിയുടെ പൊതു, സ്വകാര്യ പങ്കാളിത്ത പദ്ധതിയാണിത്.