കഴക്കൂട്ടം സൈനിക സ്കൂൾ 76-ാം റിപ്പബ്ലിക് ദിനം ആഘോഷിച്ചു

മാതൃകാപരമായ സേവനത്തിന് നാല് പൂർവ്വ വിദ്യാർത്ഥികൾക്ക് രാഷ്ട്രത്തിൻ്റെ  ആദരവ് 

 കഴക്കൂട്ടം:സൈനിക സ്‌കൂൾ കഴക്കൂട്ടം 76-ാമത് റിപ്പബ്ലിക് ദിനം സ്‌കൂൾ പരേഡ് ഗ്രൗണ്ടിൽ അത്യധികം ആവേശത്തോടെയും ദേശസ്‌നേഹത്തോടെയും ഇന്ന് (ജനുവരി 26) ആഘോഷിച്ചു.  പ്രിൻസിപ്പൽ കേണൽ ധീരേന്ദ്രകുമാർ ദേശീയ പതാക ഉയർത്തുകയും സല്യൂട്ട് സ്വീകരിക്കുകയും ചെയ്തു. രാജ്യത്തിൻ്റെ ഭാവി രൂപപ്പെടുത്തുന്നതിൽ അച്ചടക്കത്തിൻ്റെയും അർപ്പണബോധത്തിൻ്റെയും പങ്കിനെ കുറിച്ച് അദ്ദേഹം ഊന്നിപ്പറഞ്ഞു.  കേഡറ്റുകളുടെ ഗംഭീരമായ മാർച്ച് പാസ്റ്റും റിപ്പബ്ലിക് ദിനത്തിൻ്റെ പ്രാധാന്യം എടുത്തുകാണിച്ചുകൊണ്ട് ഇംഗ്ലീഷ്, ഹിന്ദി, മലയാളം ഭാഷകളിൽ ഹൃദയസ്പർശിയായ പ്രസംഗങ്ങളും ചടങ്ങിൽ അവതരിപ്പിച്ചു.  അഡ്മിനിസ്ട്രേറ്റീവ് ഓഫീസർ, കമാൻഡർ സരിൻ പി.എം അധ്യക്ഷത വഹിച്ചു.  മധുരപലഹാര വിതരണത്തോടും ഊഷ്മളമായ ആശംസകളോടും കൂടി പരിപാടികൾ സമാപിച്ചു.

 കൊച്ചിയിലെ ഇന്ത്യൻ നേവിയിലെ കമാൻഡ് ട്രാൻസ്‌പോർട്ട് വർക്ക്‌ഷോപ്പിൽ (സി.ടി.ഡബ്ല്യു.) നിന്ന് കമാൻഡർ ഹരി പ്രകാശിൻ്റെ നേതൃത്വത്തിലുള്ള 16 അംഗ ബൈക്ക് എക്‌സ്‌പെഡിഷൻ ടീമിൻ്റെ വരവ് ഈ ദിവസത്തെ പ്രത്യേക ഹൈലൈറ്റ് ആയിരുന്നു.  CTW യുടെ വജ്രജൂബിലി ആഘോഷങ്ങളുടെ ഭാഗമായി "60 to 600" എന്ന പ്രമേയത്തിലാണ് ടീം റാലി നടത്തിയത്.  ജനുവരി 24 ന് ആരംഭിച്ച യാത്ര, പൊൻമുടി, കന്യാകുമാരി തുടങ്ങിയ പ്രധാന സ്ഥലങ്ങൾ കടന്നാണ് കഴക്കൂട്ടത്ത് എത്തിയത്. ബൈക്ക് യാത്രികരെ സ്‌കൂൾ ഊഷ്മളമായി സ്വീകരിക്കുകയും കേഡറ്റുകളുമായും സ്റ്റാഫുകളുമായും ആശയവിനിമയം നടത്തുകയും ചെയ്തു.

 
ഈ റിപ്പബ്ലിക് ദിനം കഴക്കൂട്ടം സൈനിക സ്കൂളിന് അഭിമാന മൂഹർത്തമാണ്.   മാതൃകാപരമായ സേവനത്തിനും രാജ്യത്തിന് നൽകിയ മികച്ച സംഭാവനകൾക്കും "കഴക്ക്" എന്നറിയപ്പെടുന്ന നാല് വിശിഷ്ട പൂർവ്വ വിദ്യാർത്ഥികൾക്കുള്ള രാഷ്ട്രത്തിൻ്റെ അംഗീകാരം. മുഴുവൻ സ്‌കൂൾ സമൂഹത്തിനും അഭിമാനത്തിൻ്റെയും പ്രചോദനത്തിൻ്റെയും നിമിഷമായിരുന്നു.   ആൻഡമാൻ നിക്കോബാർ കമാൻഡ് മേധാവിയായ എയർ മാർഷൽ ബി സാജു, എവിഎസ്എം, വിഎം (റോൾ നമ്പർ. 1227, 1982 ബാച്ച്), ദക്ഷിണ വ്യോമസേനാ മേധാവി എയർ മാർഷൽ ബി മണികണ്ഠൻ, എവിഎസ്എം, വിഎം  (റോൾ നമ്പർ 1386, 1983 ബാച്ച് *) എന്നിവർക്ക് അഭിമാനകരമായ പരം വിശിഷ്ട സേവാ മെഡൽ *(PVSM) ലഭിച്ചു.  ധ്രുവ കമാൻഡ് ചീഫ് ഓഫ് സ്റ്റാഫ്, ലഫ്റ്റനൻ്റ് ജനറൽ വിജയ് ബി നായർക്ക് എസ്എം (റോൾ നമ്പർ 1563, 1985 ബാച്ച്),  അതി വിശിഷ്ട സേവാ മെഡലും (AVSM), ബ്രിഗേഡിയർ എ വൈ രാജന് (റോൾ നമ്പർ. 1782,  1987 ബാച്ച്) സേനാ മെഡലും (SM) ലഭിച്ചു.  

 പ്രിൻസിപ്പൽ കേണൽ ധീരേന്ദ്ര കുമാർ, ശ്രദ്ധേയമായ നേട്ടങ്ങൾക്ക് അവാർഡ് ജേതാക്കളെ അഭിനന്ദിച്ചു, അവരുടെ സമർപ്പണവും നേതൃത്വവും കേഡറ്റുകൾക്കും സ്റ്റാഫുകൾക്കും ഒരുപോലെ പ്രചോദനം നൽകുന്നതായി പറഞ്ഞു.  മികവും അച്ചടക്കവും ദേശസ്‌നേഹവും പ്രകടിപ്പിക്കുന്ന നേതാക്കളെ വളർത്തിയെടുക്കുന്നതിലൂടെ സ്‌കൂളിൻ്റെ അഭിമാന പാരമ്പര്യം ഉയർത്തിക്കാട്ടി.