വേതനപരിഷ്‌കരണം ആവശ്യപ്പെട്ടുള്ള റേഷന്‍ വ്യാപാരികളുടെ സമരം തുടങ്ങി ; നേരിടാന്‍ കര്‍ശന നടപടികളുമായി സര്‍ക്കാര്‍
ഭക്ഷ്യ-ധന മന്ത്രിമാര്‍ സംഘടാനപ്രതിനിധികളുമായി വെള്ളിയാഴ്ച ചര്‍ച്ചനടത്തിയെങ്കിലും വിജയിച്ചിരുന്നില്ല. വേതനപരിഷ്‌കരണമെന്ന വ്യാപാരികളുടെ ആവശ്യത്തില്‍ കൃത്യമായ ഉറപ്പു ലഭിക്കാതിരുന്നതോടെയാണ് ചര്‍ച്ച അലസിയത്. ഇതോടെയാണ്, ഇന്ന് മുതല്‍ റേഷന്‍ കടകള്‍ അടച്ചിട്ട് സമരത്തിലേക്ക് കടക്കുമെന്ന് റേഷന്‍ സംഘടന പ്രതിനിധികള്‍ തീരുമാനിച്ചത്.
തിരുവനന്തപുരം : വേതനപരിഷ്‌കരണം ആവശ്യപ്പെട്ട് ഇന്ന് മുതല്‍ റേഷന്‍ വ്യാപാരികളുടെ അനിശ്ചിതകാല പണിമുടക്ക്. ഭക്ഷ്യ-ധന മന്ത്രിമാര്‍ സംഘടാനപ്രതിനിധികളുമായി വെള്ളിയാഴ്ച ചര്‍ച്ചനടത്തിയെങ്കിലും വിജയിച്ചിരുന്നില്ല. വേതനപരിഷ്‌കരണമെന്ന വ്യാപാരികളുടെ ആവശ്യത്തില്‍ കൃത്യമായ ഉറപ്പു ലഭിക്കാതിരുന്നതോടെയാണ് ചര്‍ച്ച അലസിയത്. ഇതോടെയാണ്,ഇന്ന് മുതല്‍ റേഷന്‍ കടകള്‍ അടച്ചിട്ട് സമരത്തിലേക്ക് കടക്കുമെന്ന് റേഷന്‍ സംഘടന പ്രതിനിധികള്‍ തീരുമാനിച്ചത്. അതേസമയം സമരം നേരിടാന്‍ കര്‍ശന നടപടികളുമായി മുന്നോട്ടുപോകാനാണ് സര്‍ക്കാര്‍ തീരുമാനം. അടച്ചിടുന്ന കടകള്‍ ഏറ്റെടുക്കുമെന്ന് ഭക്ഷ്യമന്ത്രി ജി.ആര്‍ അനില്‍ അറിയിച്ചു. ചൊവ്വാഴ്ച മുതല്‍ സഞ്ചരിക്കുന്ന റേഷന്‍ കടകള്‍ നിരത്തിലിറക്കുമെന്നും മന്ത്രി കൂട്ടിച്ചേര്‍ത്തു. വ്യാപാരികള്‍ കട തുറക്കുമെന്നാണ് പ്രതീക്ഷയെന്നും മന്ത്രി വ്യക്തമാക്കി.
അതേസമയം റേഷന്‍കടയുടമകളുടെ സമരം കാരണം ഭക്ഷ്യധാന്യവിതരണം തടസ്സപ്പെട്ടാല്‍ നിയമനടപടിയെടുക്കുമെന്ന് സംസ്ഥാന ഭക്ഷ്യകമ്മിഷന്‍ മുന്നറിയിപ്പ് നല്‍കിയിട്ടുണ്ട്. 2013-ലെ ദേശീയ ഭക്ഷ്യഭദ്രതാ നിയമപ്രകാരം ഭക്ഷ്യാവകാശങ്ങള്‍ പൊതുവിതരണ സമ്പ്രദായത്തിലൂടെ ലഭ്യമാകുന്നുവെന്ന് ഉറപ്പുവരുത്തേണ്ടത് സംസ്ഥാന ഭക്ഷ്യകമ്മിഷന്റെ ചുമതലയാണ്. ജനുവരി തുടക്കംമുതല്‍ റേഷന്‍കടകളില്‍ സാധനങ്ങള്‍ എത്തിക്കുന്ന ലോറിയുടമകള്‍ സമരത്തിലായതോടെ ഭക്ഷ്യധാന്യവിതരണം മുടങ്ങിയിരുന്നു. ഇതിനുപുറമേയാണ് വേതനപരിഷ്‌കരണം ആവശ്യപ്പെട്ട് കടയുടമകളും സമരം പ്രഖ്യാപിച്ചത്.
ഇതിനിടെ റേഷന്‍കടകളില്‍ സാധനമെത്തിക്കുന്ന കരാറുകാര്‍ 24 ദിവസമായി നടത്തിവന്ന സമരം കഴിഞ്ഞ ദിവസം പിന്‍വലിച്ചിരുന്നു. മന്ത്രി ജി.ആര്‍. അനില്‍ സംഘടനാനേതാക്കളുമായി നടത്തിയ ചര്‍ച്ചയുടെ അടിസ്ഥാനത്തിലാണിത്.
