വയനാട് ദുരന്തഭൂമിയിൽ ഭവനം നിർമ്മിക്കാൻ കുടുക്ക പൊട്ടിച്ചും എരുമേലി നിർമ്മല സ്കൂൾ കുട്ടികൾ

എരുമേലി:- എരുമേലി നിർമ്മല പബ്ലിക് സ്കൂളിലെ അഞ്ചാം ക്ലാസ് വിദ്യാർത്ഥിനി  നിയ വർഗീസ്, വയനാട്ടിലെ വേദന അനുഭവിക്കുന്ന, ഭവന രഹിതരായ കുടുംബത്തിന് താങ്ങാകുവാൻ തന്റെ കുടുക്ക പൊട്ടിച്ച് പങ്കുവയ്ക്കുവാനുള്ള മനസ്സുമായി മുന്നോട്ടുവന്നു.സാധാരണയായി ജന്മദിനത്തോടനുബന്ധിച്ച് കുടുക്ക പൊട്ടിച്ച് സ്വന്തം ആവശ്യങ്ങൾക്കായി ചെലവഴിച്ചിരുന്ന പതിവ് തെറ്റിച്ചാണ് നിയ  സമയത്തിന് മുൻപേ കുടുക്ക പൊട്ടിച്ചത്. വയനാട്ടിലെ ജനത്തിന്റെ പച്ചയായ അനുഭവം ന്യൂസിലൂടെ കണ്ടുകൊണ്ടിരുന്നപ്പോൾ 'നമുക്ക് എന്തെങ്കിലും ചെയ്യേണ്ടേ? ' എന്ന് പിതാവ് റജി ചോദിച്ചതിന് മറുപടി എന്നവണ്ണം ഞാൻ എന്റെ കുടുക്ക പൊട്ടിച്ചു കൊടുക്കാം എന്നു പറഞ്ഞപ്പോൾ കുഞ്ഞനുജത്തി ഡിയ  വർഗീസും അതിനു തയ്യാറായി. മുത്തച്ഛന്റെയും മുത്തശ്ശിയുടെയും പ്രോത്സാഹനമാണ് ഇതുപോലുള്ള കാര്യങ്ങൾക്ക്  കുട്ടികൾക്ക് പ്രചോദനമാക്കുന്നതെന്ന് അമ്മ മാജി പറഞ്ഞു. നവംബർ മാസത്തിൽ തന്റെ ജന്മദിനത്തോടനുബന്ധിച്ച് കുടുക്ക പൊട്ടിച്ച് പാദസ്വരം വാങ്ങുന്നതിന് സൂക്ഷിച്ചു വച്ച രൂപയായിരുന്നു ഇത്. നിർമ്മലാ സ്കൂൾ 'വയനാട്ടിൽ ഒരു ഭവന' മെന്ന പദ്ധതിയിലൂടെ കുട്ടികളുടെ അധിക ചെലവ് മാറ്റിവെച്ച് അവർ നൽകുന്ന തുകയും സ്കൂളിന്റെ സംഭാവനയും ചേർത്ത് വയനാട്ടിൽ ഒരു ഭവനത്തിനു പിൻബലം നൽകുവാനുള്ള സന്നദ്ധത കുട്ടികളെ മുൻപ് അറിയിച്ചിരുന്നു. നിയാ വർഗീസിന്റെ ഈ നല്ല പ്രവർത്തിയിൽ നിന്നു പ്രചോദനം സ്വീകരിച്ച് ഒന്നാം ക്ലാസിലെ അവന്തിക ആർ നായരും, ആറാം ക്ലാസിലെ ആഘോഷ് വിനോദും,നാലാം ക്ലാസിലെ മിൻഹ  ഫാത്തിമയും , തങ്ങളുടെതായ നിക്ഷേപങ്ങൾ 'നിയ ' മോളോട് ഒപ്പം സ്കൂൾ പ്രിൻസിപ്പൽ ബഹുമാനപ്പെട്ട സിസ്റ്റർ വിൻസിയെ ഇന്ന് ഏൽപ്പിച്ചു.