സംസ്ഥാനത്ത് തുടരുന്ന കനത്ത മഴയിൽ നാശനഷ്ടം തുടരുന്നു;തൃശ്ശൂർ നഗരത്തിൽ വൻ മരം കടപുഴകി വീണു
ഇന്ന് രാവിലെ ജില്ല ആശുപത്രിക്ക് സമീപമായിരുന്നു മരം കടപുഴകി വീണത്. മണ്ണുത്തിയില്‍ നിന്നും തൃശ്ശൂര്‍ സ്വരാജ് റൗണ്ടിലേക്ക് എത്തുന്ന റോഡിലാണ് മരം വീണിരിക്കുന്നത്.
തിരുവനന്തപുരം/തൃശ്ശൂർ: സംസ്ഥാനത്ത് തുടരുന്ന കനത്ത മഴയിൽ നാശനഷ്ടം തുടരുന്നു. കനത്ത മഴയിൽ തൃശ്ശൂർ നഗരത്തിൽ വൻ മരം കടപുഴകി വീണു. ഇന്ന് രാവിലെ ജില്ല ആശുപത്രിക്ക് സമീപമായിരുന്നു മരം കടപുഴകി വീണത്. മണ്ണുത്തിയില്‍ നിന്നും തൃശ്ശൂര്‍ സ്വരാജ് റൗണ്ടിലേക്ക് എത്തുന്ന റോഡിലാണ് മരം വീണിരിക്കുന്നത്.റോഡിന് വശത്തായി നിർത്തിയിട്ടിരുന്ന രണ്ട് ഗുഡ്സ് ഓട്ടോറിക്ഷകൾ തകർന്നു. പ്രദേശത്തെ വാഹന ഗതാഗതം പൂർണമായി തടസപ്പെട്ടു. വാഹനത്തിനുള്ളിൽ ആളില്ലാതിരുന്നതിനാൽ വൻ അപകടം ഒഴിവായി. അഗ്നിരക്ഷാസേന യൂനിറ്റ് മരം മുറിച്ചുമാറ്റാനുള്ള ശ്രമത്തിലാണ്.അതേസമയം, വെള്ളിയാഴ്ച വടക്കൻ കേരളത്തിൽ മഴകുറയുമെന്നാണ് കാലാവസ്ഥ പ്രവചനം. പത്തനംതിട്ട, കോട്ടയം ഇടുക്കി, ജില്ലകൾ ഓറഞ്ച് അലർട്ട് പ്രഖ്യാപിച്ചിട്ടുണ്ട്.അറബിക്കടലിലും ബംഗാൾ ഉൾക്കടലിലും രൂപം കൊണ്ട ന്യൂനമർദങ്ങളാണ് സംസ്ഥാനത്ത് കനത്ത മഴക്ക് കാരണം. കനത്തമഴയെ തുടർന്ന് സംസ്ഥാനത്ത് ഏഴ് ദുരിതാശ്വാസ ക്യാമ്പുകൾ തുറന്നിട്ടുണ്ട്. തിരുവനന്തപുരത്ത് മൂന്നും കോഴിക്കോട്ട് രണ്ടും, കോട്ടയം, മലപ്പുറം ജില്ലകളിൽ ഓരോ ക്യാമ്പുമാണ് തുറന്നത്. 32 കുടുംബങ്ങളിലെ 102 പേരെ പാർപ്പിച്ചു.
What's Your Reaction?
