സംസ്ഥാനത്ത്​ പരസ്യ പ്രചാരണം നാളെ അവസാനിക്കും; വോട്ട്​ ചോർച്ച തടയാൻ തന്ത്രങ്ങളുമായി​ മുന്നണികൾ

തിരുവനന്തപുരം : സംസ്ഥാനത്ത്​ പ്രചാരണത്തിന്​ ബുധനാഴ്ച തിരശ്ശീല വീഴുമ്പോൾ സർവ തന്ത്രങ്ങളുമെടുത്ത്​ ജനവിധി അനുകൂലമാക്കാനുള്ള ത​ത്രപ്പാടിലാണ്​ മുന്നണികൾ.ദേശീയ രാഷ്ട്രീയവും സംസ്ഥാന സർക്കാറിന്‍റെ നടപടികളുമാണ്​ പ്രചാരണത്തിൽ നിറഞ്ഞത്​. ബി.ജെ.പി സർക്കാർ നടപടികളിൽ ന്യൂനപക്ഷങ്ങൾ ആശങ്കയിലാണ്​. സി.എ.എയും മണിപ്പൂരും സജീവ വിഷയങ്ങളാണ്​. പ്രധാനമന്ത്രിയുടെ രാജസ്ഥാൻ പ്രസംഗം സംസ്ഥാനത്തെ പ്രചാരണ രംഗത്തും മുഖ്യവിഷയമായി. സാഹചര്യം​ അനുകൂലമാക്കാൻ യു.ഡി.എഫും ഇടതും കിണഞ്ഞ്​ ശ്രമിക്കുന്നു.

ദേശീയതലത്തിൽ ഇവ ഇൻഡ്യ മുന്നണിയുടെ ഭാഗമാണെങ്കിലും കടുത്ത വിമർശനം പരസ്പരം നടത്തു​ന്നത്​ ഈ വോട്ട്​ ചോർച്ചക്ക്​ തടയിടാനാണ്​. ദേശീയ തലത്തിൽ ഒന്നാംഘട്ടത്തിൽ ബി.ജെ.പിക്ക്​ പലയിടത്തും ക്ഷീണമുണ്ടാകുമെന്ന വാർത്തകൾ കേരളത്തിൽ അനുകൂലമാകുമെന്ന്​ യു.ഡി.എഫ്​ പ്രതീക്ഷിക്കുന്നു.ആറ്റിങ്ങൽ, ആലത്തൂർ, പാലക്കാട്​, കണ്ണൂർ, വടകര മണ്ഡലങ്ങളിൽ കടുത്ത മത്സരമാണുള്ളത്​. ട്വന്‍റി ട്വന്‍റി നേടുന്ന വോട്ടുകളുടെ തോത്​ ചാലക്കുടിയിൽ നിർണായകമാണ്​. യാക്കോബായ സഭ ഇടതിന്​ പിന്തുണ പ്രഖ്യാപിച്ചിട്ടുണ്ട്​. തിരുവനന്തപുരത്തും തൃശൂരും ശക്തമായ ത്രികോണ മത്സരം നടക്കുന്നു.13 സീറ്റ്​ യു.ഡി.എഫ്​ വൃത്തങ്ങൾ ഉറപ്പിക്കുന്നു. മറ്റ്​ അഞ്ചിലധികം മണ്ഡലങ്ങളിൽ വിജയം സാധ്യമാകുമെന്നാണ്​ അവരുടെ പ്രതീക്ഷ. 20 ഉം നേടുമെന്നാണ്​ നേതാക്കളുടെ പരസ്യനിലപാട്​. കടുത്ത മത്സരമുള്ള കണ്ണൂരിൽ സ്ഥിതി മെച്ചപ്പെട്ടെന്നും വടകര അനുകൂലമായെന്നുമാണ്​ യു.ഡി.എഫ്​ വിലയിരുത്തൽ.